Arthur ki paidaish ek sperm donor ki madad se hui thi, lekin unhein yeh maloom nahin tha ki un ke hayaatiyaati (biological) baap kaun hain. Isii wajah se jab bhi wo Paris mein kahin jaate, unhein apne gird-o-pesh majood kisi bhi mard ko dekh kar khayal aata ki shayad wahi un ke asl baap ho.
Barson tak wo apne aas-paas ke mardon ko isii nazar se dekhte rahe. Wo kehte hain: “Mein sochta tha ki shayad mere ustaad hi mere baap ho, ya phir wo log jinhein mein roz bus mein dekhta hoon. Yeh khayal mujhe musalsal bechain aur gusse mein rakhta tha, kyunki is tarah zindagi guzarna bahut mushkil tha.”
Baad mein Arthur ko Audrey naam ki ek ladki se mohabbat ho gayi. Audrey bhi sperm donor ki madad se paida hui thi. Dono pehli mulaqaat mein hi ek doosre ko pasand karne lage.
Audrey apni pehli mulaqaat ko “pehli nazar ki mohabbat” qaraar deti hain, lekin dono ke zahn mein ek tashweesh majood thi: Kya yeh mahaz romaanwi kashish thi ya phir kisi jeniyaati (genetic) taalluq ka natija?
Is khadse ki ek wajah bhi thi. Arthur aur Audrey ki paidaish ke waqt Paris mein sirf do sperm bank kaam karte the aur kayi mard ek se zyada baar sperm atiya (donate) karte the. Is liye yeh mumkin tha ki Arthur aur Audrey sotele behan-bhai ho. Chananche mushtaraka zindagi ka aaghaaz karne se pehle un ke liye yeh jaanna zaroori tha ki aaya un ke darmiyan koi khooni rishta majood hai ya nahin.
Taham, France mein jeniyaati jaanch aur sperm atiya kunindgan (donors) ki shanaakht ko khufia rakhne se mutalliq sakht qawaneen ne is sawaal ka jawab talaash karne ki raah intahaai dushwaar bana di thi. France mein DNA test ke hawale se qawaneen khaase sakht hain. Wahan sirf koi tahqeeqati scientist, doctor ya judge hi DNA test ki ijaazat de sakta hai aur is ki nigraani kar sakta hai. Ghar par istemaal hone wali DNA testing kit rakhne par 3,500 Euro (taqreeban 4,288 US Dollars) se zyada jurmana bhi ho sakta hai.