Zeera, ajwain aur saunf ka paani hazma behtar banane ke liye ek maqbool qudrati mashroob hai. Kuch afraad mein khaali pet is ka istemaal gas, uphaare (bloating) aur hazme ki takleef kam karne mein madad de sakta hai, taham mahireen ka kehna hai ki ise kisi bimari ka mu’jizati ilaaj nahin samajhna chahiye.
Hazme Ke Liye Mufeed
Zeera, ajwain aur saunf mein majood qudrati murakkabaat nizaam-e-hazma ko sahara dete hain aur uphaare samet pet ki umoomi takleef kam karne mein madadgaar saabit ho sakte hain.
Wazan Kam Karne Mein Madad
In ajza mein majood hayaatiyaati murakkabaat jism mein charbi, sozish (inflammation) aur oxidative dabao ko kam karne mein mumkina kirdar ada kar sakte hain. Taham sirf yeh mashroob wazan kam karne ke liye kaafi nahin, is ke liye mutawazin ghiza aur mutaharrik routine bhi aham hai.
Mahireen-e-qalb ka sehat-mand dil ke liye rozana 15 se 30 minute nange paon chalne ka mashwara.
Khoon Mein Sugar Ki Satah Ke Liye Mu’awin
Zeere ke khoon mein sugar ko mutawazin rakhne se mutalliq musbat asraat par tahqeeq majood hai, lekin ziyaabeetes (diabetes) ke mareez ise apni tajweez kardah dawa ka mutabaadil na samjhein aur istemaal se pehle doctor se mashwara laazmi kar lein.
Zeera, Ajwain, Saunf Ka Paani Banane Ka Tariqa
1 chaaye ka chamach zeera, 1 chaaye ka chamach ajwain aur 1 chaaye ka chamach saunf 2 cup paani mein raat bhar bhigo kar ya subah paani mein ubaal kar chhaan lein aur nahaar muh is paani ka istemaal karein.
Kin Afraad Ko Ihtiyaat Karni Chahiye?
Warzish mein chand minute ki kami bhi cancer ke khatre mein 15 fesad tak izafa kar sakti hai – tahqeeq.
Haamila khawateen, tezaabiyat ya seene ki jalan ke mareez, khoon mein sugar kam karne wali adwiyaat istemaal karne wale afraad aur masaalon se allergy rakhne walon ko ihtiyaat karni chahiye.
Tahqeeq mein har juzw ki rozana miqdaar taqreeban 1 se 5 gram tak istemaal ki gayi hai, taham miqdaar har fard ki sehat aur bardasht ke mutabiq mukhtalif ho sakti hai.
Tibbi mahireen ke mutabiq is mashroob ke saath mutawazin ghiza, fiber se bharpoor ghizaon, munasib paani aur jismani sargarmi ko ma’mool ka hissa banana zyada aham hai.
Note: Yeh mazmoon qaare’een ki ma’loomaat ke liye shaaye kiya gaya hai, sehat se mutalliq umoor mein apne muaalij ke mashware par amal karein.