England duniya ke un pehle mamalik mein shamil hone ja raha hai jo jigar ko mutaasir karne wali bimari Hepatitis C ke khaatme ke hadaf ke qareeb pahoanch chuke hain.
National Health Service (NHS) ke mutabiq ab tak maloom mareezon mein 80 fesad ka kaamyab ilaaj kiya ja chuka hai jabki guzashtha 10 barson ke dauran is bimari se hone wali amwaat mein 36 fesad kami record ki gayi hai.
NHS ka kehna hai ki emergency departments mein khoon ke test, GP ke saath registration ke waqt screening aur muft gharelu test kits ki farahaami ke zariye hazaron aise afraad ki tashkhees mumkin hui jo pehle apni bimari se laa-ilm the, jis ke baad un ka baraq-t ilaaj kiya gaya.
Aadaad-o-shumaar ke mutabiq 2015 se ab tak 1 lakh se zyada afraad ki tashkhees aur ilaaj kiya ja chuka hai.
Mahireen ka kehna hai ki jadeed anti-viral adwiyaat 8 se 12 hafton tak istemaal karne se taqreeban 95 fesad mareez mukammal sehat-yaab ho jaate hain jis ke baais England Hepatitis C ke khaatme ke aalami hadaf ke hsool ke mazeed qareeb pahoanch gaya hai.