Zindagi mein pareshani aur tangdasti har ek insaan ke hisse mein aati hai, lekin farq sirf itna hota hai ke kuch log mushkilat ke aage toot jaate hain aur kuch log inhi pareshaniyon ko apni sabse badi taaqat bana lete hain. Agar aap bhi kisi mushkil waqt ya pareshan halat se guzar rahe hain, toh zaroori hai ke yeh 5 baatein hamesha apne zehen mein rakhein.
Sabse pehli baat yeh hai ke pareshani kitni hi badi kyun na ho, aapko ghabrana nahi hai. Yeh qudrati baat hai ke insaan udaas bhi hota hai, rota bhi hai aur pareshan bhi hota hai, lekin apni pareshani ko is had tak khud par haavi mat hone dein ke aap apni izzat-e-nafs aur khud-e-etmadi (self-confidence) hi kho baithein. Hamesha yaad rakhein ke mushkil waqt aarzi (temporary) hota hai aur yeh hamesha nahi rehta. Jo cheez aapke ikhtiyaar mein hai use behtar banane ki koshish karein, aur jo aapke bas mein nahi hai us par baar baar soch kar khud ko halkaan aur pareshan na karein. Agar aap khud ko zehni taur par majboot banana chahte hain toh humara article zehni jazbati tor par mazboot ban ne ke usool zaroor parhein.
Doosri baat yeh ke apne jazbaat (emotions) ko kabhi bhi mustaqil taur par khud par ghalib na hone dein. Agar dil udaas hai toh kuch waqt udaas rehne dein, rona aaye toh ek kone mein ja kar ro lein, aur agar akele baithne ka dil kare toh kuch der tanhai ikhtiyaar kar lein. Lekin is ke baad khud ko sambhaalna zaroori hai taake aap dobara apni aam zindagi ki taraf wapas aa sakein. Kabhi kabhi jab log aap se door hone lagein ya jab koi aap ko nazar andaz kare to bhi khud ko sambhaalna aana chahiye, aur ek mushkil din ko poori zindagi ka mizaj samajhne ki galti kabhi mat karein.
Teesri baat yeh ke jab bhi koi pareshani aaye, toh overthinking karne ke bajaye mental planning aur problem solving par gaur karein. Agar aapka result kharaab aa gaya hai ya kisi kaam mein nakami (failure) hui hai, toh baar baar yeh sochne se ke “mere sath hi aisa kyun hua” nateeja nahi badle ga. Overthinking ke bajaye yeh sochein ke galti kahan hui, agli baar kya behtar karna hai, aur kaun sa naya raasta ikhtiyaar kiya ja sakta hai. Yehi soch aapko kaamyabi (success) ki taraf le ja sakti hai. Is ke alawa zindgi mein aage badhne ke liye yeh bhi dekhein ke aap kin logon ke sath rehte hain, jaise ke humne bataya hai 5 qisam ke log jin ki sohbat se apko bachna chahiye. Jab hum kisi masle ke andar hote hain toh humein sirf pareshani nazar aati hai, is liye thoda piche hat kar masle ko ek neutral perspective se dekhein aur khud se poochhein ke ab kya options hain. Bahut mumkin hai ke aapko wo sahi hal nazar aa jaye jo pehle dikhai nahi de raha tha.
Chauthi baat yeh ke mushkil waqt mein apni zubaan par poora control rakhein. Pareshani mein kisi se badtameezi kar dena aur baad mein yeh kehna ke “main pareshan tha” bilkul ghalt ravayya hai. Aapki pareshani doosron ko takleef dene ka jawaaz (justification) nahi ban sakti. Agar gussa aaye toh fauran jawab na dein, chand lamhe khamosh rahein aur zaroorat ho toh safai se keh dein ke aap is waqt zehni dabaao (mental stress) mein hain aur baad mein baat karenge.
Paanchwi aur aakhri baat yeh hai ke khud ko poori tarah akela na chhodchein. Kisi aise shakhs se baat karein jis par aapko poora etmaad (trust) ho. Agarche masla fauran hal na bhi ho, lekin kisi samajhdaar insaan se dil ki baat keh dene se zehen aur dil ka bojh kafi halka ho jata hai. Is ke sath sath apni bunyaadi routine ko kharaab na hone dein; waqt par khayein, munaasib neend lein, aur kuch der walk ya jismani sargarmiyon mein zaroor hissa lein, kyun ke kabhi kabhi vitamin b12 ki kami be chaini aur ghabraahat ka sabab ban sakti hai.
Ek mazboot aur samajhdaar insaan wo nahi hota jise kabhi pareshani nahi hoti, balki mazboot insaan wo hota hai jo pareshani ke bawajood khud ko sambhaalta hai, apni izzat-e-nafs ko barqaraar rakhta hai, apni galtiyon se seekhta hai aur dobara khada hota hai. Mushkil waqt mein hamesha khud se ek hi sawaal karein ke “Aaj main apni soorate-haal behtar banane ke liye kaun sa step utha sakta hoon?” aur phir bina jhijkhe wo zaroori step uthaayein.
Leave a Comment