Assalam-o-Alaikum dosto!
Aaj hum aap ko aisay mulk ki sair karane ja rahe hain jis ne Europe ko bhi peeche chhod diya hai, jahan har koi karodon kamata hai. Aisa mulk jahan Pakistani aur Indians aasani se Europe jane ki jagah ja sakte hain. Jee haan, aaj hum sair ko ja rahe hain Singapore ki, jo kabhi chuhe khane par majboor tha aur aaj duniya ka sab se ameer mulk ban gaya hai, jahan Pakistani aasani se ja sakte hain aur kaam bhi kar sakte hain. Yahan ke log kaisi zindagi guzarte hain, is mulk k khoobsurat maqamaat kaun se hain yeh sab kuch janenge aaj ki is post mein. Chalen ab nikalte hain Singapore ki taraf!
Yeh mulk ek shandaar safar par le jata hai, is ka official naam “Republic of Singapore” hai. Yeh woh mulk hai jahan har koi jana chahta hai. Yahan ke log safai ke junoon mein mubtala hain. Mazaq ki baat yeh hai ke yahan aap ko ek bhi kooradani (dustbin) nazar nahi aayegi, lekin is ke bawajoode kahin bhi kachra nahi milega kyunke hukumat kachra phenkne par jurmana karti hai. Shayad safai ke mamle mein koi mulk is se aage nah ho. Yahan ke log bahut mehnati aur takhleeqi (creative) samjhe jate hain. Har koi kam karta hai aur yahan ke log kamai kar ke khane peene par yaqeen rakhte hain. Is mulk mein karorpati bhi bahut hain.
Republic of Singapore
Ek report ke mutabiq yahan ka har chhatta aadmi millionaire hai, isi wajah se is ka naam duniya ke sab se ameer tareen mumalik mein aata hai. Is mulk ka kul raqba 734 murabba kilometer hai, matlab yeh ke yeh mulk Bharat aur Pakistan ke kisi bhi bade shehar se chhota hai. Aap ek din mein bhi poora mulk dekh sakte hain. Agar abaadi ki baat ki jaye toh is ki kul abaadi taqreeban 6 million hai. Is mulk ne chand salon mein itni taraqqi ki hai ke isey “Asian Tiger” bhi kaha jata hai. Singapore ka koi dar-ul-hukumat (capital) nahi hai kyunke Singapore khud hi mulk bhi hai aur dar-ul-hukumat bhi. Singapore mein char sarkari zabanein hain: Tamil, Cheeni, Malay aur English.
Is ke ilawa Singapore mein Bharati bari tadaad mein maujood hain. Kul abaadi ka taqreeban 9 % Bharati hain jo lag bhag 4 lakh ke qareeb bante hain, jise “Mini India” bhi kaha jata hai. Pakistanion ki tadaad taqreeban 7,000 ke qareeb hai jo bahut zyada paisa kama rahe hain. Singapore 42 kilometer lamba aur sirf 23 kilometer chauda hai, lekin yeh bahut khoobsurat mulk hai, isi wajah se siyah (tourists) lakhon ki tadaad mein yahan aate hain. Doston, kya aap ne kabhi Changi Airport ke baare mein suna hai? Yeh itna khoobsurat airport hai ke khoobsurati ke lihaz se yeh duniya mein number aik par aata hai.
Friends Posing in Tropical Airport
Kaha jata hai ke yeh mulk jitna khoobsurat hai, is se bhi zyada khoobsurat is mulk ka airport banaya gaya hai. Is airport par land karne ke baad aap bas airport hi dekhte reh jayenge. Yahan ke logon ko jo kaam diya jata hai, dobara un se poochhne ki bhi zaroorat nahi parti kyunke yeh log bahut zimadari se kaam karte hain. Doston, aaj duniya ki bari bari componiyon ke head offices bhi is mulk mein hain. New Zealand ke baad Singapore sab se zyada business-friendly mulk samjha jata hai. Yahan ke logon ki salana aamdani sun kar aap hairan reh jayenge!
Is ke aage toh Europe bhi kuch nahi hai, itna paisa toh Europe wale bhi nahi kamate. Jee haan, bat bilkul yehi hai. Yahan ke logon ki ausat (average) salana aamdani taqreeban 50,000 dollar ke qareeb hai jo Pakistani rupaye mein karodon ke barabar banti hai. Ausat aamdani ke lihaz se yeh duniya mein 11 number par aata hai. Singapore ke logon ka tarz-e-zindagi (lifestyle) duniya mein sab se behtareen samjha jata hai. Kya aap jaante hain woh kaun sa mulk hai jahan ke logon ka IQ level sab se oopar hai? Jee haan, woh bhi Singapore ke log hain. Doston, kaha jata hai ke yeh duniya ka woh mulk hai jahan 95 % log apne gharon ke malik hain.
Singapore Travel Collage
Yahan ke logon par fauji service lazmi qarar di gayi hai, har shakhs ko kuch arsa fauj mein guzarna padta hai. Singapore ke log imandari mein bhi bahut se doosre mulkon se aage hain. Yehi wajah hai ke har koi Singapore ja ke business karna chahta hai. Yeh mulk itna jadeed ho chuka hai ke hotel ho ya restaurant, har jagah aap ko feedback system laga hua nazar aaye ga taake service mein mazeed behtari lai ja sake. Yahan tak ke washroom mein bhi feedback system ki screen lagai hui hoti hai. Doston, koi bhi mulk jo is maqam tak pohanchta hai, is mein aap ko teen cheezein zaroor milengi: Behtareen nizam, amn aur imandari. In ke baghair koi mulk taraqi nahi kar sakta. Yeh teenon cheezein Singapore mein pai jati hain.
Hotels, shopping centers, buland-o-bala imaraat, jadeed tarz-e-zindagi ye sab kuch aap ko Singapore mein nazar aaye ga. Singapore mein barishein bhi bahut zyada hoti hain, lekin aap ko sarkon par pani khara hua dikhai nahi dega. Barish ki wajah se yahan sabza bhi bahut zyada hai. Aap is mulk ko “Green Dubai” bhi keh sakte hain. Jitna yeh jadeed aur taraqqi yafta hai, utna hi mehenga bhi hai, lekin logon ki aamdani bhi bahut zyada hai, isi liye unhein zyada farq nahi padta. Singapore ki currency Singapore Dollar hai jo Pakistani rupaye ke taqreeban 213 aur Indian rupaye ke 61 ke barabar hai.
Singapore’s Merlion Skyline
Singapore mein mukhtalif mazahib ke log aabad hain jin mein Hindu, Muslim, Budh mat aur Isaaiyat shamil hain. Har kisi ko mazhabi aazadi hasil hai. Singapore bunyadi tor par ek mulk nahi balke ek city-state hai. Yeh mulk sakht qawaneen, jadeed infrastructure ki wajah se poori duniya mein mashhoor hai. Yahan aap ko sab se zyada South Indian log dikhai denge. Aap jis gali ya bazaar se bhi guzrein, aap ka Indian logon se zaroor samna hoga. Indian ka ek bazaar bahut mashhoor hai jise Diwali Bazaar (Little India) kaha jata hai.
Doston, yahan aap ko aksar log nazar ke chashme lagaye hue nazar aayenge, shayad is ki wajah yeh hai ke yahan ke log bahut zyada kaam karte hain aur har koi paise kamata hai chahe mard ho ya aurat. Singapore meyaar-e-zindagi mein Switzerland ke baad doosre number par aata hai. Is mulk mein itna maal hai ke aap yahan se bhi andaza laga sakte hain ke Singapore ke wazeer-e-mumlikat (Prime Minister/Ministers) ki tankhwah America ke sadar ki tankhwah se bhi zyada hai. America ke sadar ki bunyadi tankhwah salana 4 lakh dollar hai, jabke Singapore ke sab se chhote wazeer ki tankhwah bhi lakhon dollars mein hai.
Happy Deepavali on Little India Street
Yahan ke log sabzion aur hariyali se bahut muhabbat karte hain, har jagah aap ko sabzian aur paude nazar aayenge chahe imaraat ki chhattein hon ya koi shopping center. Doston, kya aap jante hain duniya ka sab se mazboot passport kaun sa hai? Aap kahenge America ya England, lekin aisa nahi hai, Singapore ka passport duniya ka sab se mazboot passport hai jis se aap 190 se zyada mumalik mein baghair visa ke ja sakte hain. Singapore ke logon ke pas ek aur anokha record bhi hai, woh duniya mein sab se zyada tez chalne wale logon mein shamil hain. Singapore pehle number par hai. Kaha jata hai ke yahan ke log paidal chalne mein duniya mein sab se tez hain. Yahan se aap andaza laga sakte hain ke yahan ke log kitne fit hain.
Doston, sochne wali baat yeh hai ke kya yeh mulk hamesha se aisa tha? Toh jawab hai nahi. Aaj yeh itni taraqqi kar chuka hai ke koi soch bhi nahi sakta ke yeh mulk kabhi bhook se mar raha tha. Logon ke pas khane ko bhi kuch nahi tha. Aur sab se hairan kun bat yeh hai ke aik shakhs (Lee Kuan Yew) ne Singapore ko zameen se utha kar aasman tak le pohanchaya. Is ne sab se pehla kaam jo kiya woh yeh tha ke poore mulk mein insaf ka nizam qaim kiya aur imandar judges lagaye. Un ke pas mukammal taqat thi, yeh chowkidar se le kar wazeer-e-aazam tak sab ko talab kar sakte the.
Smiling in a Lush Indoor Atrium
Is shakhs ne aazadi ke baad ek sabaq diya aur kaha: “Aazadi ka kya matlab hai? Kya is ka matlab hai ke jarnail aur siyasatdan loot maar karne ke liye aazad hain aur awaam bhook se marte rahein?” Lee Kuan ne kaha corruption khatam kiye baghair Singapore taraqqi nahi kar sakta. Is waqt sab se sakht sazayein bhi is mulk mein di gayi theen. Jab aisi sazayein hon toh kaun sochega corruption karne ka? Is ke baad doosra kaam yeh kiya ke is ne apne logon par sarmaya kari ki, ghar banaye gaye jin ki wajah se berozgari bhi kam hone lagi.
Sanad yafta karigaron ko sasti zameen aur sahulatein di gayin jis se baramdaat (exports) ka silsila bhi shuru hua. Taleem aur hunar ko khas tawajjoh di gayi. Taleemi idare sirf degrees dene wale nahi the balke hunarmand logon ki laboratory the. Har kaam ke liye sirf merit par logon ko rakha jata tha. Yahan tak ke Singapore Airport ki taraqqi ke liye Karachi se Kaptan Saeed ki khidmaat hasil ki gayin. Qanoon ka itna khauf tha ke jab kuch bureaucrats par corruption ke alzamaat lage toh unhone khudkushi kar li kyunke woh jante the ke ab hum nahi bach sakte.
Singapores-Lee-Kuan-Yew-Success-Story.webp
In sab koshishon ke baad Singapore ki taraqqi ka safar shuru hua aur Europe jaise bare bare mumalik ko peeche chhod diya. Aaj duniya mein Singapore corruption ke aitabar se sab se kam corruption wale mumalik mein shamil hai. Aaj duniya ka har mulk Singapore jaisa banna chahta hai, jabke yeh mulk ek waqt tha jab duniya ka sab se bara kachra khana samjha jata tha. 1965 tak sirf 5 feesad logon ke pas apna ghar tha, aaj 95 feesad log apne ghar ke malik hain. Yeh mulk 734 murabba kilometer mein phaila hua hai, jis ki GDP 500 billion dollar hai aur yeh 515 billion dollar ki export bhi karta hai, jis mein chemical, electronics aur services industry shamil hain.
Yeh mulk size ke lihaz se Pakistan ke shehar Lahore ke nisf size ka hai aur Pakistan ki export taqreeban 30 billion dollar hai. Yahan ke logon ki ausat umar 84 saal hai, matlab log aam tor par 84 saal tak zinda rehte hain. Is mulk ki khwandgi (literacy rate) ki sharah 97.5 % hai. Duniya mein sab se behtareen taleemi nizam mein pehle number par Finland hai jabke doosre number par Singapore hai. Is mulk mein duniya ki chand top-ranked universities bhi maujood hain jin mein National University of Singapore, Singapore Management University aur Nanyang Technological University shamil hain.
ingapore A Small Nation Big Achievements
Singapore University mein parhai ka kharch 20,000 se 60,000 Singapore Dollars ke darmiyan hai. Singapore Management University mein parfhne ka kharch taqreeban 24,000 Singapore Dollars hai. Is mulk mein mahine ka rehne ka kharch 2,000 se 4,500 dollar tak hota hai. Doston, yeh mulk bahut khoobsurat aur jadeed hai. Yahan salana taqreeban 80 lakh tourists aate hain. Jab aap Singapore ke Changi Airport par utrenge toh aap yaqeenan kuch der is airport ko dekhte reh jayenge.
Zyada tar tourists aap ko Marina Bay Sands mein nazar aayenge jahan khoobsurat hotels, night life, samundar ka dilkash manzar aur jadeed sahulatein maujood hain. “Gardens by the Bay” Singapore ka mashhoor aur bahut hi khoobsurat bagh hai jo apni jadeed tameeraat aur khoobsurati ke liye jana jata hai. Yahan Super Trees lagaye gaye hain jo raat ko roshnion ka behtareen manzar pesh karte hain. Sentosa Island bhi Singapore ki ek bahut mashhoor jagah hai jahan aap ko Universal Studios, machhlion ka ek bahut bara aquarium, khoobsurat sahil aur samundar dekhne ko milenge. Is mulk mein China Town bhi hai jahan ja kar aap ko ehsaas hoga jaise aap China mein aa gaye hon, har taraf Cheeni thaqafat nazar aayegi. Agar aap khareedari ke shauqeen hain toh Orchard Road yaqeenan jaiyega jahan aap ko har taraf shopping malls nazar aayenge.
Singapore Visa & Work Opportunities
Clarke Quay mein kashti ka safar zaroor kijiyega, bahut maza aayega, raat ka manzar dekhne ke laaiq hota hai. Singapore bahut se visas offer karta hai jin mein tourist visa ki fee taqreeban 6,000 se 10,000 Pakistani rupaye hai. Work permit ke liye aap ko third-party agencies ke zariye apply karna parta hai. Singapore yeh visa offer karta hai jis mein sab se aham document Letter of Introduction hota hai, matlab ke Singapore mein maujood koi company ya Singapore ka national aap ko invitation letter bheje toh aap ghar baithe khud visa apply kar sakte hain.
Singapore mein sab se aasani se kaam karne ke liye jane ka visa Short-Term Holiday Work Visa hai. Yeh visa aam tor par kuch khas mahenon mein kholay jaate hain, jis mein chhote kaam hote hain aur nah hi kisi khas degree ki zaroorat hoti hai. Is vise ki muddat 6 mah hoti hai. 18 se 25 saal ke naujawan, doston, is vise par aasani se ja sakte hain. Jo log Europe jana chahte hain, unhein ek bar Singapore ke bare mein zaroor sochna chahiye. Yeh bahut khoobsurat mulk hai aur yahan kamai Europe se bhi zyada hai.
Doston, yeh thi aaj ki hamari maloomati aur dilchasp post. Aap ko post kaisi lagi, comments mein zaroor batayein.